Interdissiplinere argeologiese navorsing van musiekinstrumente in antieke Israel/Palestina gedurende die ystertydperk

Abstract

In hierdie verhandeling word navorsing gedoen of ‘n interdissiplinêre benadering daaraan kan voldoen om meer kennis, insig en begrip van die musiekkultuur in die algemeen en musiekinstrumente in die besonder gedurende die Ystertydperk in Israel/Palestina te verkry. Die sosio-historiese agtergrond en kulturele ontwikkeling van Egipte, Kanaän, Filistea en Fenisië vorm die raamwerk waarbinne antieke Israel as ‘n volk ontwikkel het. Die invloed van transkulturele kontak kulmineer in die oorname, toeeiening en toepassing van sekere kulturele en godsdienstige gebruike soos dit duidelik word uit argeologiese en tekstuele bronne. Die ontleding en bespreking van musiekartefakte en musiek-ikonografie plaas die gebruik van musiekinstrumente binne die leefwêreld van die hoëlui sowel as gewone mense. Musiekinstrumente word ook verbind aan godsdiens en kulturele sinkretisme wat deel was van Israel/Palestina van die Ystertydperk. Interdissiplinêre navorsing kan aantoon in watter mate antieke Israel uit die musiekkultuur van omringende volke elemente geneem het en dit aangepas het tot ‘n eiesoortige musiekkultuur.